Follow Us

*KYQU SHQIP ENGLISH
E Premte, 28.02.2020 10:31

​Vetëm një bankë në Kosovë ofron mundësi për blerjen e aksioneve në bursat botërore ?

Prishtinë | 19/01/2020 11:41

Në të gjitha vendet e Evropës qytetarët mund të blejnë aksione në bursat botërore përmes bankave komerciale.

Derisa bankave në Kosovë u mundësohet edhe me rregulloren e Bankës Qendrore të Kosovës për të ofruar shërbime për blerjen e aksioneve në vendet tjera, ato janë të fokusuara vetëm në instrumentet financiare në formën e huadhënies, për çka ekspertë të ekonomisë konsiderojnë se këto banka duhet të avancohen dhe konkurrenca në rangun bankar duhet me qenë më cilësore dhe me më shumë produkte.

Drejtori i departamentit  të Thesarit në Raiffeisen Bank në Kosovë, Berat Isa thotë se për KosovaPress, se kjo bankë u ofron mundësinë klientëve të saj që të qasen në bursat ndërkombëtare dhe të blejnë aksionet e firmave të ndryshme që tregohen në bursat ndërkombëtare, qoftë në Evropë ose në Shtetet e Bashkuara të Amerikës.

Isa shprehet se Raiffeisen Bank në Kosovë, vonë është kyçur në këtë treg, krahasuar me degët tjera ku operon Raifesen Bank, por me aprovimin e ligjit për banka në vitin 2012, njëra prej aktiviteteve të lejuara është edhe mundësia për tregtuar në letra me vlerë, qoftë për qëllime vetanake të bankës, qoftë për t’i ofruar këtë mundësi që vet klientët të blejnë.

Isa duke u shprehur se janë të vetmit në Kosovë që ofrojnë këtë mundësi për klientët, thotë se është një numër i konsiderueshëm i klientëve që shprehin interesim të marrin pjesë në tregun evropian, por edhe në Kosovë.

KosovaPress ka kërkuar përgjigje edhe nga bankat tjera, por asnjëra prej tyre nuk janë përgjigjur se përse nuk i ofrojnë këto shërbime për klientët e tyre. As në shoqatën e bankave nuk janë deklaruar lidhur me këtë temë.

Zëdhënësi i BQK-së, Kushtrim Ahmeti, thotë për KosovaPress, se bankat në politikat e veta specifikojnë operacionet aktivitetet financiare në të cilat angazhohen brenda licencës që kanë.

Kryetari i Odës Ekonomike të Kosovës, Berat Rukiqi thotë për KosovaPress, se bankat në Kosovë e kanë një funksion tjetër, janë kryesisht ndërmjetësues financiar në instrumentin e huas për financimin e atyre që kanë nevojë.

Përderisa rritja e kreditimit në sektorin bankar po ndodhë në vazhdimësi e përcjellë me zvogëlim të mëtutjeshëm të kredive jo performuese, fitimi i bankave komerciale për vitin 2019 ishte rreth 80 milionë euro./KosovaPres/

Loading...
 
 

Shpërndaje


Artikuj të sponzorizuar

Më shumë nga KosovaPress