Iniciativa vullnetare “Babadimiri Ekziston” ka mbledhur para, rroba dhe gjësende tjera të ndryshme, që disa prej tyre në formë të dhuratave i ka dërguar tek fëmijët e shtrirë në pediatri.

Nita Zeqiri, vullnetare e kësaj iniciative tregoi për KosovaPress se në këtë vit është rritur mbështetja krahasuar me vitin e kaluar.

Përveç fëmijëve që janë të vendosur në pediatri,psikiatri dhe kirurgji së bashku me projektin MAT dhe kryqin e kuq “Babadimri Ekziston” do të ndihmojë edhe fëmijë të tjerë që janë në gjendje të rëndë ekonomike.

“Babadimri ekziston, sivjet i ka mbledh shumë dhurata duke i përfshirë veshje, rroba për fëmijë për të rritur të moshave të ndryshme, lodra të panumërta, libra të ndryshme edhe gjithashtu edhe fonde të ndryshme monetare të cilët kanë dhuruar njerëz të ndryshëm për të blerë dhurata për fëmijë. Sivjet kemi paketuar 1400 dhurata kemi shtuar numrin për 400 dhurata më shumë, po i shpërndajmë në pediatri, psikiatri të fëmijëve, kirurgji të fëmijëve sot dhe pastaj në bashkëpunim me MAT projektin dhe kryqin e kuq duhet ti shpërndajmë edhe dhurata tjera nëpër familje të cilat janë me kushte ekonomike të dobëta dhe do të mundohemi që ti gëzojmë fëmijët”,tha ajo.

Ndërsa Muharrem Avdiu drejtor i klinikës së pediatrisë tha se këta fëmijë e meritojnë më së shumti që të vizitohen.

“Para kamerave duhet të dalin donatorët ata që u ka rënë në mend që ekziston klinika e pediatrisë, e që janë fëmijët këtu fëmijët e sëmur, fëmijët tanë dhe këta fëmijë që meritojnë me u vizitu edhe meritojnë me ja u bë më të lehtë qëndrimin në klinikën e pediatrisë.....Të mirat për fëmijët këtu janë gëzimi më i madh i joni”, tha Avdiu.

Iniciativa “Babadimri Ekziston”, vitin e kaluar ka bërë dhurata për fëmijët e shtrirë në klinikën e Pediatrisë në QKUK, si dhe për fëmijët e familjeve që jetojnë tek “Fusha e Pajtimit”, ata që jetojnë në të ashtuquajturën “Lagjja e Kuvajtit” dhe tek disa familje në lagjen Kolovicë të Prishtinës. Aktivitetin e tyre e patën përfunduar me shpërndarjen e dhuratave në shtëpinë e pleqve./KosovaPress/

Kjo web faqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.

Të gjitha të drejtat e rezervuara nga A.P.L. KosovaPress - COPYRIGHT
2002-2019