Follow Us

*KYQU SHQIP ENGLISH
E Hënë, 30.11.2020 09:15

​Istogu me dëme të mëdha materiale nga erërat e forta

Prishtinë | 06/02/2020 13:51

Pas reshjeve të shiut dhe erërave të forta që kapluan vendin tonë këto ditë, Komuna e Istogut vazhdon të mbetet ndër vendet që ka pësuar dëme më të mëdha materiale, si pasojë e së cilave një pjesë e kësaj komune ka mbetur pa energji elektrike dhe pa shkolla funksionale.

Kryetari i Komunës së Istogut, Haki Rugova, bëri të ditur se nuk ka asnjë person të lënduar nga kjo fatkeqësi natyrore, por që dëmet materiale janë shumë të mëdha.

Ai tha se kanë formuar komisionin për mbrojtje dhe shpëtim, të cilët sipas tij kanë filluar menjëherë punën në terren.

Rugova mendon që këto erëra do ta shoqërojnë Istogun edhe ditëve në vazhdim, e për këtë arsye ai pret që nesër ta vizitojë qeveria në mënyrë që të gjejnë zgjidhje buxhetore për këto dëme.

Ai bëri të ditur se shkollat nuk do të hapen as nesër, ndërsa sa i përket energjisë elektrike tha se KEDS është duke punuar intensivisht dhe se sot brenda ditës një pjesë e zonave urbane do të jenë të furnizuara me energji elektrike.

Drejtori i shkollës fillore ‘Hysni Zajmi në fshatin Vrellë, Sadik Bicaj tha se kjo është një ndër shkollat me më shumë dëme materiale dhe se nuk ka kushte për mësim deri të hënën.

Drejtori i Urbanizmit, Besart Dreshaj tha për KosovaPress, se janë duke punuar në terren dhe se shumë shpejt do të dalin me një raport lidhur me vlerën e dëmeve të shkaktuar nga erërat.

Qytetari Vehbi Zogaj, tha për KosovaPress, se fshati Kaliqan i komunës së Istogut, ka rreth 300 shtëpi dhe se mbi 80 për qind kanë pësuar dëme nga erërat. /KosovaPress/


Loading...
 

Shpërndaje


Artikuj të sponzorizuar

Më shumë nga KosovaPress